नेकपा एमालेका अध्यक्ष केपी शर्मा ओलीले सत्तारुढ गठबन्धनका दलहरूसँग एक्लै चुनाव लड्ने आँटै नभएको टिप्पणी गरेका छन् । गठबन्धनले देशमा स्वस्थ प्रतिस्पर्धाको साटो दुस्मनी र झगडातर्फ लैजान खोजेको उनले आरोप लगाए ।
लोकतान्त्रिक शेर्पा संघको अधिवेशनमा सम्बोधन गर्दै ओली खासगरी सरकारको नेतृत्वकर्ता नेपाली कांग्रेसमाथि खनिएका थिए । उनले कांग्रेसलाई ‘लौरो टेकेर पनि अडिन नसक्ने भएको’ भन्दै कटाक्ष गरे ।
ओलीले भने, ‘बिचरा कांग्रेस माया लाग्छ । यो पार्टी के भएको ? लौरो टेकेर पनि अडिन सक्दैन । खुट्टै टेक्न नसक्ने भयो । कहिले प्रचण्ड खोज्या छ, कहिलेको खोज्या छ । के भएको रु एउटा जिउँदो पार्टी त यति साह्रो नहुनुपर्ने ।’
कांग्रेसले लोकतन्त्रलाई गलत दिशामा धकेलिरहेको ओलीले बताए । यो प्रवृत्तिले देश अप्ठेरोमा पर्न सक्ने उनको चेतावनी थियो ।
‘देशभित्रका जनताको परस्परमा दुस्मनी भयो भने त्यसले विकृत रुप लिन्छ । अर्काले फाइदा लिन्छ । कांग्रेस आफ्नै बुद्धिले हो वा अरूको उक्साहटमा हो, देशलाई त्यही दिशामा लगिरहेको छ,’ उनले भने ।
कांग्रेससँग कुनै सोच विचार नै नरहेको ओलीले आरोप लगाए ।
उनले थपे, ‘कांग्रेसको कार्यक्रम हेर्नुभयो भने केही पनि आउँदैन । बहुदल आएपछि २१ वर्ष सरकारको नेतृत्व गर्यो । २१ वर्ष नेतृत्व गर्दा यो काम गरेँ भनेर देखाइदियोस्, एउटा पनि छैन । कम्युनिस्टले बुढाबुढी मार्छ भनेर हल्ला चलायो । ६० वर्षभन्दा बढी भएपछि गोली हालेर मार्छन् भन्यो । तर म ७१ वर्षको मान्छे अध्यक्ष छु ।’
Leave A Comment