साबिक च्याम्पियन फ्रान्स कतारमा जारी फिफा विश्वकप फुटबलको नकआउट चरण (अन्तिम १६) प्रवेश गर्ने पहिलो टिम बनेको छ । आज शनिबार राति भएको समूह चरणको दोस्रो खेलमा फ्रान्सले परिचित प्रतिस्पर्धी डेनमार्कमाथि २–१ को रोमाञ्चक जित निकाल्दै अन्तिम खेलअघि नै नकआउट चरण प्रवेश गरेको हो ।
यससँगै फ्रान्स यस विश्वकपमा अन्तिम १६ प्रवेश गर्ने पहिलो देश पनि बनेको छ । पहिलो खेलमा फ्रान्सले अस्ट्रेलियामाथि ४–१ को जित निकाल्दै विजयी सुरुआत गरेको थियो ।स्टाडियम ९७४ मा भएको खेलमा फ्रान्सलाई जिताउन युवा स्टार केलियन एमबाप्पेले उत्कृष्ट प्रदर्शन गर्दै २ गोल गरे ।
फ्रान्सले खेलमा पहिला अग्रता लिएर त्यसपछि गोल खाए पनि खेलको अन्तिम समयमा एमबाप्पेले गोल गरे टिमलाई नकआउटको टिकट दिने महत्त्वपूर्ण जित दिलाए । टिमको जितमा २ गोल गरेका एमबाप्पे आजको खेलको नायक बने । उनले यसअघि अस्ट्रेलियाविरुद्धको खेलमा पनि १ गोल गरेका थिए ।
उनले लगातार दोस्रो खेलमा गोल गर्न सफल भएका हुन् ।खेल अवधिभर निकै आक्रामक रुपमा प्रस्तुत भएको साविक विजेता फ्रान्सले पहिलो हाफमा भने गोल गर्न सकेको थिएन । डेनमार्कका कप्तान तथा गोलरक्षक कास्पर स्माइकलले फ्रान्सको आक्रमणलाई विफल पारेका थिए ।
तर दोस्रो हाफको सुरुवातमै एमबाप्पेले फ्रान्सलाई अघि बढाए । त्यसको केहीबेरमा नै डेनमार्क बराबरी गोल गर्न सफल भएपनि एमबाप्पेले अन्तिम समयतिर विजयी गोल गरे ।६१ औं मिनेटमा एमबाप्पेले अग्रता दिलाएका थिए । उनले थिओ हर्नान्डेजसँग दायाँ विंगमा सुन्दर वन टु पास खेल्दै अवसर सिर्जना गरेका थिए ।
अन्त्यमा हर्नान्डेजकै कटब्याकमा एमबाप्पेको प्रहार डिफेन्डरलाई लाग्दै गोल भएको थियो ।६८ औं मिनेटमा डेनमार्कले बराबरी गोल फर्कायो । आन्द्रेस क्रिस्टेन्सनले कर्नरमा आएको बललाई हेडरमार्फत गोल गरेका थिए । क्रिस्टियन एरिक्सनको कर्नरमा जोअचिम एन्डरसनले बलको दिशा परिवर्तन गरेपछि क्रिस्टेन्सनले ६ यार्ड बक्स नजिकबाट हेडर गोल गरे ।
निर्धारित समयको ४ मिनेट बाँकी रहँदा फ्रान्सले एमबाप्पेकै गोलमा पुन: अग्रता लियो । एन्टोइन ग्रिजमनको क्रसमा एमबाप्पेले फार पोस्टमा आफ्नो शरीरले गोल गर्दै अग्रता दिलाए । उनले डिफेन्डरको मार्किङ तोडेर पोस्ट नजिकबाट बललाई गोललाइन पार गराएका थिए ।
यस नतिजासँगै समूह डी बाट फ्रान्स नकआउट चरणमा प्रवेश गरेको छ । उपाधि रक्षा गर्ने लक्ष्यसहित कतार आएको टोली जारी विश्वकपमा समूह चरण पार गर्ने पहिलो टोली पनि बन्यो । फ्रान्सको २ खेलमा ६ अंक छ । अष्ट्रेलियाको ३ तथा डेनमार्क र ट्युनिसियाको १-१ अंक छ । अन्तिम खेलमा फ्रान्सले ट्युनिसिया र डेनमार्कले अष्ट्रेलियासँग खेल्नेछ ।
Leave A Comment