विश्वकप फुटबलअन्तर्गत समूहगत चरणको आफ्नो दोस्रो खेलमा जापानले आइतबार कोस्टारिकासँग खेल्दै छ। नेपालीसमयअनुसार अपरान्ह पौने ४ बजे सुरु हुने खेलमा जित हात पार्न सके जापानले एक खेल अगावै प्रिक्वार्टरफाइनलमा स्थान बनाउन सक्ने छ।
त्यसका लागि आइतबार राती हुने समूहको अर्को खेलमा जर्मनी र स्पेनबीच बराबरी हुनुपर्ने छ। समूहमा स्पेन र जापानको समान ३ अंक छ। कोस्टारिका र जर्मनीले अंक जोड्न सकेका छैनन्। पहिलो खेलमा जापानले जर्मनीलाई २–१ गोलले हराएको थियो भने कोस्टारिका, स्पेनसँग ७–० गोलले पराजित भएको थियो।
सन् १९९८ देखिका हरेक विश्वकप संस्करण खेलिरहेको जापान यसबीचमा तीनपटकसम्म पहिलो चरण पार भएको छ। गत संस्करणमा पनि प्रिक्वार्टरफाइनलसम्म पुगेको थियो। जापानले यसअघि सन् २००२ को विश्वकपमा मात्र लगातार दुई खेल जितेको थियो।
अन्तर्राष्ट्रिय फुटबलमा कोस्टारिकाले जापानलाई हालसम्म हराउन सकेको छैन। यी दुई टोलीबीच भएका चार भिडन्तमा जापानले तीन खेल जितेको छ भने एक खेल बराबरी भएको छ। अन्तिमपटक सन् २०१८ मा प्रतिस्पर्धा गरेकामा जापान ३–१ गोलले विजयी भएको थियो।
यो पनि – मेक्सिकोसँगको जितपछि अर्जेन्टिनाका गोलकिपर इमिलियानो मार्टिनेजले कप्तान लियोनल मेसी टिममा हुँदा सबै कुरा सहज हुने बताएका छन् ।जित्नैपर्ने खेलमा मेक्सिकोलाई २–० ले पराजित गर्दा मेसीले एक गोल र असिस्ट गरेका थिए । जितसँगै विश्वकपको समूह ‘सी’मा रहेको अर्जेन्टिनाले समूह चरणबाट बाहिरिने खतरालाई टारेको थियो ।
पहिलो हाफमा बराबरीमा रोकिए पनि ६४औँ मिनेटमा मेसीले १८ यार्ड बक्सबाहिरबाट गोल गर्दै अर्जेन्टिनालाई अग्रता दिलाएका थिए । ८७औँ मिनेटमा मेसीकै असिस्टमा इन्जो मार्टिनेजले गोल गरेपछि अर्जेन्टिना २–० ले विजयी भयो ।“यदि, हामीले हार बेहोरे विश्वकपबाट बाहिरिनेछौँ भन्नेबारे हामीलाई राम्रो जानकारी थियो ।
र, मेक्सिकोले खेललाई अझ कठिन बनायो,” मार्टिनेजले भने, “तर, हामीसँग मेसी थिए र यदि मेसी सधैँ कठिन कुरालाई पनि सहज बनाइदिन्छन् । हामीले हाम्रो क्षमतामा कहिल्यै शंका गरेनौँ । तर, पहिलो खेलपछि परिस्थिति केही असहज बन्यो । यद्यपि, आज हामीले यहाँ जितका लागि आएका हौँ भन्ने देखाउन सफल भयौँ ।”
पहिलो खेलमा १–० को अग्रता लिएको अवस्थामा साउदीलाई २–१ ले नतिजा सुम्पिएपछि अर्जेन्टिनाको अन्तिम–१६ यात्रा अनिश्चित बनेको थियो । तर, मेक्सिकोलाई हराएसँगै तालिकाको दोस्रो स्थानमा उक्लिएको अर्जेन्टिना केही सहज अवस्थामा पुगेको छ । अर्जेन्टिनाले अब समूहको अन्तिम खेलमा पोल्यान्डसँग खेल्नेछ ।
Leave A Comment