Latest
img

एमालेमा बिजोग हुने अवस्था आएर नयाँ पार्टी गठन गरियो

नेकपा (एकीकृत समाजवादी)का अध्यक्ष माधवकुमार नेपालले एमाले अध्यक्ष केपी ओलीबारे सकारात्मक कुरा गर्दै नगर्न पार्टीका नेता, कार्यकर्तालाई कडा निर्देशन दिएका छन्।

शनिबार काठमाडौँमा आयोजित पार्टीको उपत्यका विशेष युवा जिल्ला भेलामा बोल्दै अध्यक्ष नेपालले ओलीबारे सकारात्मक हुने खालको कुनै पनि प्रचार नगर्न पार्टी पंक्तिलाई सचेत गराएका हुन्। ओलीबारे पोजिटिभ हुने गरी प्रचार गरिए सैह्य नहुने उनको चेतावनी थियो।

अध्यक्ष नेपालले हामीलाई अपराधि घोषणा गर्ने, देशद्रोही भन्ने, अस्तित्वलाई समेत स्विकार नगर्ने ओलीलाई मुखभरीको जवाफ दिन पार्टीका नेता, कार्यकर्ताहरुलाई सक्रिय हुन आग्रह समेत गरे। उनले एमालेसँग जाने कल्पना समेत गर्न नसकिने पटकपटक दोहोर्‍याए।

अध्यक्ष नेपालले विचार मिल्ने, कुरा मिल्ने बामपन्थी दलहरुसँग एकतावद्ध भएर जाने प्रस्ताव आफ्नो पार्टीले अगाडि बढाइरहेको तर एमालेसँग भने मिल्ने कुनै सम्भावना नभएको बताए। उनले स्थानीय तहको चुनावमा भन्दा पनि थप सफलता हासिल गर्नका लागि आफ्नो पार्टीले आगामी चुनावमा पनि सत्तारुढ गठबन्धन कायमै राखेर अघि बढने निर्णय लिएको उल्लेख गरे।

अध्यक्ष नेपालले भने, ‘हामी गठबन्धन दलहरुसँग अहिले पनि हातेमालो गर्दै अघि बढ्ने पक्षमा रहेका छौं। हाम्रो पार्टीले बामपन्थी दलहरुलाई एकतावद्ध बनाउनका लागि हामीसँग कुरा मिल्ने, विचार मिल्नेहरुसँग एकतावद्ध हुनका लागि हामीले हात अगाडि बढाएका छौं। हामी अरुसँग विलिन हुने होइन।

हाम्रो विरोधीहरुले कुप्रचार गरिरहेका छन एमालेमा विलिन हुने भनेर। त्यसमा कुनै सत्यता छैन। हाम्रो पार्टी विचारको आधारमा उभिएको छ। हाम्रो पार्टी आर्दशको आधारमा उभिएको छ। त्यसो हुनाले एमालेले जेसुकै बोलोस्। त्यसका नेताहरुले हामीलाई जथाभावी आरोप लगाउन। त्यसको हामीले जवाफ दिन सक्नु पर्दछ। झुटको पुलिन्दा बाँडिरहेका छन्।

जनतामा भ्रम फैल्याउने कोसिस गरिरहेका छन्। त्यो भ्रमलाई चिर्नुपर्छ हामीले। उनीहरुले लेख्छन भने पनि काउन्टर जवाफ दिनुपर्छ हामीले। उनीहरुको महिमा गर्ने होइन।

केपी ओलीका खुट्टा टाँसीटाँसी हिँड्ने पनि होइन। हामीलाई समाप्त पार्ने कोसिस गरेसम्म हामीले पनि उनीहरुप्रति माया, दया गरेर बस्ने पनि होइन। अहिले पनि मसँग खबर आइरहेका छन्–केपी ओलीसँग बस्न सकिदैन भन्दै कतिपय मानिसहरुले सम्पर्क गरिरहेका छन्।

यही चुनावमा पनि हामी एकीकृत समाजवादीमा आएर चुनाव लड्न चाहन्छौं भनिरहेका छन्। त्यसो हुनाले एमालेसँग जाने कल्पनानै गर्न सकिदैन। जुन पार्टीले हाम्रो अस्तित्व स्विकार गर्दैन। जसले हामीलाई अपराधि घोषणा गरेको छ। जसले हामीले देशद्रोही भनेको छ। त्यस्ता नेताप्रति कुनै किसिमले पोजेटिभ कुराको प्रचारप्रसार कसैले पनि नगर्नू होला।

गर्नु हुन्छ भने कुरा विग्रन्छ म क्लियर गर्न चाहन्छु। त्यस्ता कुराहरुमा लाग्न जरुरी पनि छैन। बरु खण्डन गर्ने, सिधै मुखभरीको जवाफ दिने । मुखभरीको जवाफ दिनु भएनभने रक्षात्मक भइन्छ। त्यस्ता मान्छेले केही पनि गर्न सक्दैन।’

अध्यक्ष नेपालले पार्टी विभाजन भएको बेला गएका १० भाइहरुको एमालेमा बिजोग भइरहेको टिप्पणी पनि गरे। एमालेमा बिजोग हुने अवस्था आउने देखेरै आफूहरुले बाध्य भएर नयाँ पार्टी गठन गर्नु परेको उनको भनाइ थियो।

यहाँ प्रकाशित कुनै समाचारमा तपाईंको गुनासो भए हामीलाई इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुकट्विटरमा पनि जोडिन सक्नुहुन्छ ।

Related Post

Leave A Comment