कतारमा जारी फिफा विश्वकप फुटबलमा आइतबार हेभिवेट फाइनल खेल हुँदैछ, उपाधिका लागि साबिक विजेता फ्रान्स र अर्जेन्टिनाको खेल हुँदैछ । हालसम्म दुई–दुईपटक उपाधि जितेका यी दुई राष्ट्र यसपटक तेस्रो उपाधि जितेर जर्सीमा ‘तेस्रो तारा’ थप गर्ने दौडमा छन् ।
लियोनल मेस्सीको टिम अर्जेन्टिनाविरुद्ध विश्वकपको फाइनल खेल्दा फ्रान्सलाई यदि कुनै खेलाडीको सबैभन्दा ठूलो तनाव हुनेछ भने ती मेस्सी नै हुन् । फ्रान्सको मन–मुटुमा सबैभन्दा धेरै डर र त्रास मेस्सीकै हुनेछ । मेस्सी यस विश्वकपमा उत्कृष्ट लयमा पनि छन् । उनले ६ खेलबाट ५ गोल र ३ गोलमा असिस्ट गरिसकेका छन् ।
अर्जेन्टिनासँगको फाइनल खेलअघि फ्रान्सका खेलाडी र प्रशिक्षकले लगातार खेलबारे धारणा राखिरहेका छन् । मोरक्कोलाई सेमिफाइनलमा २–० ले हराएर फाइनल पुगेपछि फ्रान्सका खेलाडी ओलिभर जिरउड र थियो हर्नान्डेजले मेस्सी र अर्जेन्टिनालाई चे’ तावनीमूलक सन्देश दिएका छन् ।
विश्वकपमा ४ गोल गरेर गोल्डेन बुटको दौडमा रहेका जिरउडले मेस्सी असाधारण खेलाडी भए पनि उनलाई आफूहरूले आइतबार राति जीवनको सबैभन्दा उत्कृष्ट रातको खुसी मनाउन नदिने भन्दै हराएरै छाड्ने चे’ तावनी दिएका छन् । मेस्सीको तारिफ गर्दै जिरउडले भनेका छन्–
‘मेस्सी एक असाधारण खेलाडी हुन् । उत्कृष्ट मध्ये एक । तर, हामी आइतबार मेस्सीलाई उनको जीवनको सबैभन्दा उत्कृष्ट रातमा बाँच्न दिन गइरहेका छैनौं । उनले आइतबारको रातमा उत्सव मनाउने पाउनेछैनन् । किनभने, हामी दोस्रोपटक विश्वच्याम्पियन बन्न फाइनलमा सबथोक दिन गइरहेका छौं ।’
त्यसैगरी, टोलीका प्रमुख युवा डिफेन्डर थियो हर्नान्डेजले फाइनल खेल हुँदा अर्जेन्टिनाका मेस्सीले आफूहरूलाई नडराउने बताएका छन् । उनले अर्जेन्टिना राम्रो टोली भएकाले जित्नका लागि राम्रो मेहनत गर्नुपर्ने बताएका छन् । ‘मेस्सीले हामीलाई डराउँदैनन् ।
हामीलाई थाहा छ– अर्जेन्टिनासँग अविश्वसनीय टोली छ । आइतबार आफ्नो उत्कृष्ट प्रदर्शन गर्न हामीले राम्रोसँग रिकभर गर्न आवश्यक छ,’ हर्नान्डेजले भने, ‘यदि हामी च्याम्पियन बन्न चाहन्छौं भने उनीहरूको भन्दा उत्कृष्ट प्रदर्शन गर्नुपर्छ ।’
Leave A Comment